/

Биринчи Президентимиз, буюк давлат ва сиёсат арбоби Ислом Каримов таваллудининг 80 йиллигига бағишланган турли маънавий-маърифий тадбирлар Сурхондарё вилоятида ҳам ўтказилмоқда.
Давлатимиз раҳбарининг 2017 йил 27 ноябрдаги “Ўзбекистон Республикасининг Биринчи Президенти, буюк давлат ва сиёсат арбоби Ислом Абдуғаниевич Каримов таваллудининг 80 йиллигини нишонлаш тўғрисида”ги қарори ижроси доирасида ташкил этилаётган тадбирларда давлат ва жамоат ташкилотлари раҳбарлари, олимлар, шоир-ёзувчилар, маънавият тарғиботчилари, санъаткорлар, меҳнат фахрийлари ва ёшлар фаол иштирок этмоқда.
Биринчи Президентимизнинг “Юксак маънавият – енгилмас куч”, “Ёшлар бугунги ва эртанги ҳаётимизнинг ҳал қилувчи кучидир”, “Президентга мактублар”, “Ўзбекистон Республикасининг Биринчи Президенти Ислом Абдуғаниевич Каримов фаолияти хроникаси (Солнома)” китобларининг тақдимоти иштирокчиларда катта таассурот қолдирмоқда.
Вилоят марказида ташкил этилган шундай тадбирда Ўзбекистон Республикаси олий ва ўрта махсус таълим вазири И.Мажидов, Фуқароларнинг ўзини ўзи бошқариш органлари фаолиятини мувофиқлаштириш бўйича Сурхондарё вилояти кенгаши раиси ўринбосари О.Соатов ва бошқалар бугунги тинч-осойишта ва фаровон турмушимиз, озод ва обод ҳаётимизни барпо этишда Биринчи Президентимизнинг оқилона сиёсати муҳим аҳамият касб этганини таъкидлади. Буюк давлат ва сиёсат арбобининг оғир ва машаққатли йилларда амалга оширган улкан ишлари, юксак инсоний фазилатлари ёдга олинди.
Сурхондарё вилояти истиқлол йилларида саноати ривожланган ҳудудга, улкан бунёдкорлик майдонига айланмоқда. Тошгузар – Бойсун – Қумқўрғон темир йўли, Хонжиза полиметалл рудалар кони, қишлоқларда барпо этилаётган намунавий уй-жойлар, таълим, тиббиёт муассасалари, мусиқа ва болалар спорти иншоотлари Биринчи Президентимиз номи билан бевосита боғлиқ.
Тадбирда Сурхондарё вилояти ҳокими Э.Турдимов сўзга чиқди.
Х.МАМАТРАЙИМОВ,
ЎзА мухбири