/

Энг улуғ, энг азиз байрам — мустақиллигимизнинг 25 йиллигига бағишлаб Ўзбекистон “Адолат” СДП ҳудудий ташкилотлари, партия фаоллари томонидан жойларда тарғибот тадбирлари олиб борилмоқда.
Партиямизнинг “Буюк ва муқаддассан, ҳур Ўзбекистон” лойиҳаси доирасида Олтинсой тумани “Янги қурилиш” маҳалласидаги қишлоқ врачлик пунктида ўтказилган тадбир “Тинч ва фаровон юртнинг фарзандлари соғлом ва қудратли бўлур” мавзусида ташкил этилди.
— Юртимиз соғлиқни сақлаш тизимини ислоҳ қилишга, соҳанинг моддий-техник баъзасини ривожлантиришга устувор вазифа сифатида қаралмоқда. Натижада аҳолига тиббий хизмат кўрсатиш сифати тубдан яхшиланиб, мамлакатимизнинг эл саломатлиги йўлида олиб бораётган ишлари дунё жамоатчилиги томонидан юқори баҳоланмоқда, — дейди Ўзбекистон “Адолат” СДП Олтинсой туман кенгаши раиси Шавкат Шукуров.
Жумладан, мамлакатимизнинг жанубий ҳудуди бўлган Сурхон воҳасида сўнгги йилларда вилоят соғлиқни сақлаш тизимига қарашли тиббиёт муассасаларининг янги замонавий бинолари қад ростлаб, жаҳон андозаларига мос жиҳозланаётганлиги фикримиз ифодасидир. Аҳолининг кўпчилик қисми қишлоқларда истиқомат қилишини назарда тутсак, эл соғлиғини асраш, оналик ва болаликни муҳофаза қилишда малакали тиббий хизмат кўрсатаётган ҚВПлар нақадар муҳим ўрин тутаётганини теран англаймиз.
Шунингдек, қишлоқ врачлик пунктида яратилган шароитлар, ходимларнинг профессионал маҳорати, замонавий тиббий ускуналардан фойдаланиш кўникмаларига эътибор қаратган партия фаоллари мазкур ҚВПда “Соғлом она ва бола йили” Давлат дастури ижроси доирасида амалга оширилаётган ишлар билан яқиндан танишдилар.
Мақсуд ТЎРАЕВ,
Сурхондарё вилоят кенгаши матбуот котиби